作曲 : Traditional
Tréimhse chaitheas-sa seal go haerach
I measc mo ghaolta go soilbhir sámh,
Gan suim i gcleasa ná i gcúrsaí an tsaoil seo
A chuirfeadh m’intinn ar seachrán.
Thugas gean is urraim dom bhaile dhúchais,
Fuair cion is clú ar fud Inse Fáil.
Is ní thréigfead feasta don ghrá ródhlúth san
Do Bhaile Bhúirne go bhfaighidh mé bás.

Is breá é amharc an chnoic is a sléibhte
Sna gleannta féarmhara gach maidin cheoigh,
Is fuaim gach caise ag sníomh go héasca
Go sroisid béal na mbailte mór.
Is breá iad coillte na gcrannaibh ndíreach
Ag fás go líonmhar i measc gach gleann’
Go bhfaigheann an sionnach scáth is díon ann
An druid chiardhubh, an broc is an chreabhar.

Tá Baile Bhúirne go fairsing fáilteach
A’ riar’ na táintibh lena ngabhann ‘na treo
Go bhfuil grá is lasadh i gcroí gach éinne
Rug barr ar aon ní dá bhfacaís fós.
Bíonn triall na sluaite ar a tiobraid naofa
Tá le cianta dlútha fá ghradam mhór
Ach impím feasta ar Ghobnait naofa
Bheith mar dhíon is scáth agam
Pé áit’na ngeobham.