Mentem meam ledit dolor,
nam natalis soli color,
color, inquam, genuinus
fit repente peregrinus.

Magnus, inquam, comes ille,
qui destruxit seras mille
Mahumeti fede gentis,
genu nobis iam flectentis.

Hunc Hylerde urbs expavit,
Fraga virum trepidavit,
que sub una simul luce
hoc succumbunt nostro duce.

Barchinonam, Taragonem,
Arelatem, Taraschonem
rexit florens ope, fama,
terrens hostes his plus flamma.

Victor semper, nunquam victus
cuius terror fuit hictus
sepe fures emit auro
illos ornans crucis lauro.

Ausu constans pertinaci,
sensu vigens perspicaci,
ad se orbem fere totum
traxit tonans in remotum.

Nam hunc, magnus rex Francorum
mirabatur et Anglorum,
Huic favebat Alemannus,
Dextram dabat Toletanus.

Mentem meam ledit dolor,
nam natalis soli color,
Sub communi cessit morte,
sed celesti vivat sorte.
Amen.