麗娘白）風吹梧桐葉落沙喇...喇, 風吹梧桐葉落沙喇...喇. 
 麗娘唱）粉冷香銷, 泣絳紗, 風飄飄, 魂在望鄉台下, 夜螢螢, 墓門開處鬼離家, 行一步, 心驚怕, 哦, 原來是賺花陰, 夜犬吠螢花, 倩芭蕉遮掩在荼薇架, 原來是樵樓鼓, 落寒更報月華, 休怕, 休怕, 待重見窗裡冤家, 重續孽緣燈月下. 
 
 夢梅白）唉吔, 月色透羅幃, 已是更深時候啦, 重有邊個嚟敲門呢吓, 呀, 大抵是雨打竹帘, 風搖鐵馬定啦. 
 麗娘白）開門. 
 夢梅白）明明係有人叫門之聲架噃, 係邊位呀. 
 麗娘白）是我. 
 夢梅白）係女人聲嚟噃, 呀, 梗係個個小道姑佢送茶問暖定喇, 韶陽師姐呀, 夜喇, 唔駛啦. 
 麗娘白）開門呀. 
 夢梅白）佢又唔扯噃, 又係嘅, 人地一場心事, 送茶問暖, 唔開門又點得呢, 不如開咗度門, 接過杯茶, 唉, 打發佢扯把啦, 點番枝蠟蠋先. , 
 夢梅白）唉吔, 唉吔......奇...奇怪啦, 點解開左度門, 莫講話人影都冇, 鬼影都冇, 點解呀, 唉吔, 唔通呢度真....喺有鬼嘅, 咪講笑, 閂番度門, 訓覺把喇, 唉吔 . 
 麗娘白）柳公子. 
 夢梅白）呢..位小姐, 我同你素昧生平, 點..解你識得我. 
 麗娘白）柳公子，素昧生平, 都仍可相逢夢裡囉, 咁相逢又何必要問相識呢, 我...我望你珍重良宵剎那. 
 夢梅白）小..姐, 到底你駕雨而來, 抑或乘風而入, 你幾時入咗嚟我都唔知嘅, 真..係嚇到我心...心搖意蕩眼昏花啦. 
 麗娘白）柳公子, 所謂最難風雨故人來, 不是故人又怎能乘風駕雨呢, 你何必要問我點樣嚟唧, 我究竟都係嚟咗囉, 其實, 我在你心生綺念嘅時候已經嚟咗啦, 唉吔, 公子, 咁你既怕又何必想, 既想又何必怕呢. 
 夢梅白）我...我幾時有心生綺念呀, 縱使有, 不過都係客館寂寥, 想念下畫裡嘅嬌娃唧. 
 
 麗娘白）你落嚟啦. 
 夢梅白）叫我落黎. 
 麗娘白）唔. 
 夢梅白）唉吔, 本來佢不明來歷, 我應該要避之則吉, 不過你睇下佢, 你睇佢意態撩人, 斜倚在芭蕉樹下, 輕弄絳紗, 真係好容易令人 心...心生綺念, 唔得, 我要問真吓妳至得, 小姐. 
 
 夢梅唱）月裡仙降凡塵, 佢輕弄絳紗, 輕弄絳紗, 莫非冷煙蔽月華, 她雨中竟致迷途呀迷途錯歸家. 
 夢梅白）妳係唔係呀.
 麗娘白）唔係. 
 麗娘唱）我寄寓寄寓在 ­柳陰下, 悲風霜乞片瓦. 
 夢梅唱）我非關有意有意苦追查, 夜半芳齋欠奉茶, 妳莫借西廂送藥茶, 我借盞秋燈妳小心歸去罷. 
 麗娘唱）唉, 嘆惜我命如霧裡花, 杜麗娘未有家 ­泣孤寡. 
 麗娘白）我...我無家可歸嘅.
 夢梅白）哦, 原來妳連家都冇, 世間女子焉有無家之理, 呀..哈.., 我知啦. 
 夢梅唱）莫非天仙姐姐妳愛我瀟灑, 偷偷降落柳生衙, 可惜我 一...介...潦倒潦倒嘅寒儒 怕有偏差. 
 麗娘白）你錯啦.
 麗娘接唱）既屬有夢鑄佳話, 當管不了月夜, 月呀夜叩奔君家, 我慕君風華, 我愛君風華, 盼君泣月下, 屈居柳陰受霧雨打, 盼蝶來活了解語花. 
 夢梅白）小姐, 點解妳忽然 又淚隨聲下.
 夢梅唱）佢泣訴多風雅, 悲逝水韶華, 呀, 妳欲仿效情花呢再萌芽. 
 夢梅白）小姐, 妳是否係文君新寡呀. 
 麗娘白）唔係.. 
 夢梅白）唔係呀, 哦.
 麗娘唱）貞花未嫁,
 夢梅白）哦,妳未嫁. 
 麗娘唱）我獨處深閨未嫁. 
 夢梅唱）哦.. 既是天仙天仙未嫁, 哎吔, 亦緣也, 咁就福份也, 哎吔, 想落心中驚怕噃, 心中驚怕. 點解會相見焦樹下. 
 麗娘唱）君心休怕啦, 君心休怕, 君不記你揖拜仙觀下, 風吹飛花有心報與君, 在佛前為你灑, 致令郎拾去我丹青畫. 
 夢梅白）吓..哦, 咁­到底妳 從何而來. 
 麗娘白）哎吔, 公子, 你何必疑雨疑雲 驚風怕雨唧, 丹青畫丹青畫, 我生於畫中, 當然係來自畫中啦. 
 夢梅白）來自畫中, 莫非妳就係畫裡真真. 
 麗娘白）你­睇真下, 
 夢梅白）我對真下. 
 麗娘白）係唔係呀.
 夢梅白）呀, 真係噃.
 麗娘唱）咁真與假呢. 
 夢梅唱）確未有差. 
 麗娘唱）祗係腰瘦減. 
 夢梅唱）一般貌­似花, 丹青仙姿兩瀟灑. 
 麗娘唱）被冷煙冷煙蓋玉顏, 銷毀了鉛華, 驟降丹青價咯. 
 夢梅唱）鴛鴦帳裡同夢去囉, 
 麗娘唱）又怕冰肌凍著了郎又怕. 
 夢梅唱）唔怕, ­唔怕. 
 麗娘唱）我又怕又怕聽二更 斷續了兩三下. 
 夢梅唱）怕月照香衾, 且閉窗莫理它. 
 
 麗娘白）唉吔......相公......柳郎......公子......
 麗娘唱）唉, 未閉西窗容我講句傷情話, 宋玉都應憐薄命花, 決不是秋風秋雨催人嫁囉, 當解花有根原玉有芽. 
 夢梅白）小姐, 我知道妳係一點冰清, 不是亂紅衰柳嘅, 咁到底小姐你......
 麗娘唱）呀, 麗娘亦有千金價, 我系出黃堂太守家, 劫餘尚記我嘅爹娘話呀, 佢話我係昆山良璧玉呀無瑕. 唉, 祗為驚夢遊園, 空累我爹娘掛. 
 夢梅白）吓, 驚夢遊園...遊園驚夢......哦, 
 
 夢梅唱）一句驚夢遊園, 一段丹青畫戀, 根深蒂固早連芽, 當日在柳川, 曾夢會一佳人, 小立在梅花樹下, 佢招手問姻緣, 夢醒難再續, 夢梅兩字我為記情花, 燈下看呀丹青, 執手問呀嫦娥, 嗟莫是夢中人也. 
 麗娘白）係. 
 夢梅唱）唉吔, 卿果是夢中人, 我是黃梁客, 小樓是引渡嘅仙查, 倩丹青作良媒, 雖未有十匣量珠, 望他日文章有價, 不在梅邊在柳邊, 若許夢梅能折柳, 做一個蟾宮客 耀才華, 我帶著一表寒酸, 兩袖清貧, 拜上黃堂談婚嫁呀. 
 麗娘唱）慢...你休向堂前求父母呀. 
 夢梅白）哦, 莫非宰閣嫌貧呀. 
 麗娘唱）唔係, 我恐觸親心會淚如麻. 
 夢梅白）咁梗係太守堂中, 不容一個白衣女婿哩. 
 麗娘唱）唔係, 冷香閨, 三載悄無人. 
 夢梅白）小姑居住梗係悄無人啦. 
 麗娘唱）唉, 剩牙床蛛網塵封殘月下呀. 
 夢梅唱）唉吔, 哦, 仲估話花徑不曾緣客掃, 待郎採折武陵花, 花是有情花, 嗟我未成名 終是假. 
 
 麗娘白）唉吔, 柳郎...柳郎, 你誤會我囉, 我唔係咁嘅意思嘅，唉
 麗娘唱）痴心經已贈君,休要弄碎情芽, 麗娘心千般痛呀, 請對奴笑番吓, 
 麗娘白）柳郎, 我要你笑. 乜笑得咁肉酸嘅唧, 我同你有生死之情, 梗願訂生死之約嘅. 
 麗娘唱）唉, 嗟我冰雪身都已經硬化囉, 似易散嘅雲霞, 不堪提往事, 真難言說話, 呀, 借燈謎, 我願君呀你權度下. 
 麗娘白）咁啦, 不如我打個燈謎你猜下好嗎, 嗱你聽住吓, 燈已滅, 緣已絕, 待等君來臨秀穴, 如今都仍是半明滅. 你諗吓. 你明唔明白. 
 夢梅白）我...我唔明白. 
 麗娘白）你諗真下啦, 唉, 點解你個人咁聰明, 而家忽然會咁蠢嘅呢, 唉. 
 麗娘唱）妾長眠柳蔭, 蓋面憑絳紗, 在梅林夜聽秋雨, 任由它飄飄向墓灑, 一壞冷土是我家, 風吹雨打. 
 麗娘白）柳郎, 咁你明白未唧. 
 夢梅白）我真係唔明白呀. 
 麗娘白）本來我同你情意正濃, 我都唔想講你聽嘅, 但我而家講到咁明, 乜你都重未明白咩, 
 夢梅白）什麼秋燈, 什麼夜雨, 盡是閨門傷春之句, 咁我又猜下啦, 燈己滅, 緣已絕......
 
 最良白）書齋都燈已滅, 何以對樓情未絕呢, 歷歷鶯聲殘樓月. 哼.. 你慌唔喺果個壞鬼書生發寒熱咩, 如果唔係呢，就梗係收埋個小道姑喺裡面談風月定啦, 好, 等我閱你一閱, 若果真有其說, 你都幾難走脫, 開門…開門. 
 夢梅白）邊個...邊個. 
 最良白）係我, 送茶嚟. 
 麗娘白）哦...我認得啦...係我地陳老師嘅聲音嚟嘅. 
 夢梅白）弊啦...弊啦...麗娘, 你係太守千金, 我係秀才落拓, 兩人都要顧體面噃, 若果洩漏春光, 豈不是惹人笑駡呢. 
 麗娘白）你咪咁傻啦, 你睇下冷月照人, 秋燈放亮, 無路可逃, 我避無可避, 你不如索性去開咗度門啦. 
 夢梅白）唉吔, 開門喎, 得了嘅咩, 男女授授不親, 何況斗室幽歡, 甚於瓜田李下. 
 麗娘白）唔怕哩, 自古話有緣千里能相會, 無緣對面都不相逢, 我見佢, 佢唔見我嘅......
 夢梅白）點解佢唔見你呀. 
 麗娘白）係...睇吓...佢蒼蒼白發喇噃, 梗喺老眼昏花啦嘛，去啦...
 夢梅白）妳哩埋先. 
 麗娘白）得啦, 我會嘅哩. 
 夢梅白）妳哩埋先, 嚟啦..嚟啦. 
 最良白）喂，開唔開, 唔開, 我撞門而嚟過噃. 
 夢梅白）哦, 嚟, 開緊啦...開緊啦. 
 最良白）緊..緊, 開緊. 
 夢梅白）老師也你仲未呌呀, 咁夜呌啦, 你呌啦. 
 最良白）哼, 幹得好事呀...做得好事. 
 麗娘白）嘻嘻...嘻嘻...
 最良白）做咩呀...做咩呀, 邊個笑. 
 夢梅白）咪我笑囉, 嘻嘻...嘻嘻...
 最良白）唔係...唔係你笑得咁肉酸嘅，頭先寧寧舍舍笑得好好聽嘅, 響下便嚟嘅, 響下便嚟, 等我落去睇吓. 
 夢梅白）冇人呀......
 最良白）乜嘢冇人呀, 我要照..照一照至得, 照一照咋, 喂..你隻手做乜嘢, 做乜嘢, 
 夢梅白）呀, 無..嘢我...
 最良白）你隻手做乜嘢,揖揖揚揚. 
 夢梅白）我隻手有啲雞爪風呀. 
 最良白）吓, 雞爪風, 我睇你啲麻雀風就真啦, 豈有此理, 喂, 喂, 喂, 開嚟, 開嚟 開嚟, 我睇你呀, 唔係有多少神經病, 你都梗係故弄玄虛, 想遮瞞我定啦, 喂, 喂, 喂, 我明明聽見間房裡頭有歷歷鶯聲, 哼..哼..我睇你梗係收埋個小道姑喺西窗共話哩. 
 夢梅白）哦, 老師, 你千祈唔好咁講呀, 小道姑係一個出家人, 持齋拜禮. 你讀書人, 你唔好玷辱了百練袈娑呀. 
 最良白）百練袈娑...嘩...咦.奇啦, 點解呢, 喂, 點解有啲花落到我成面成頭都喺嘅呢, 咦...奇啦, 
 諗諗下我身前又冇花, 後面又冇花, 點解有喺頭殼頂一片片咁飛落嚟. ..唔...狐舍..呢度唔係狐舍, 就鬼墟, 唉吔, 想落有的可怕噃. 
 夢梅白）唉, 老師, 呢間係南樓, 就唔係狐舍, 芳苑唔係鬼墟, 係你老人家疑心生暗鬼唧, 邊度有事幹得, 番去早的抖啦, 何必枉作搜查得. 
 最良白）唓, 你慌我怕鬼咩, 我幾廿歲唔怕鬼嘅. 
 最良唱）我係老儒生懷中藏古玉, 批夜卷, 掌上都有朱砂. 等我照一照芭蕉樹, 閃一閃映泉燈, 忙忙解玉燈頭掛. 
 最良白）行開, 行開, 行開, 等我照吓, 行開我照埋個便, 我仲要照照哩便, 咦...唉吔, 喂...喂，秀才嚟...嚟，我明明見到一個影子閃在你身後, 呀, 點知我一照, 佢就好似化作一縷煙咁,咦, 好似入咗幅丹青畫裡便, 呀, 喂，呢一幅到底乜野畫嚟呀. 
 夢梅白）吓, 點解忽然間唔見左佢呢吓, 老師, 我而家實在都神昏智亂, 你...你自己埋去睇..睇真下啦. 
 最良白）梗睇啦, 吓, 奇啦, 明明係有一影子縮咗入畫嚟嘅，點解又唔見呢喂, 唉吔, 唔通古畫成精, 咦, 唉吔, 睇真吓呢個....唉吔..陰公啦.. 
 夢梅白）老師, 呀, 點解你見幅畫會喊起上嚟呀. 
 最良白）喊呀止哪. 
 
 最良唱）老淚縱橫聲咽啞, 丹青畫的是麗春花, 立雪程門真聲價, 累得我飯後尋思午響茶, 麗娘對我情非假, 教我如何不想她, 喂, 你幾時偷入靈台下, 何解你盜取描容掛在衙. 
 最良白）柳夢梅, 我以為你係一個寒酸嘅秀才, 點不知你係一個脂粉客, 你千唔該, 萬唔該盜取小姐遺容, 掛在疏帘自賞, 喂, 你盜得遺容, 自然會勾三搭四, 我正話明明聽見有女子之聲, 緣何不見女子之面, 唔駛審, 你梗係收埋個小道姑嘅. 
 夢梅白）冇呢. 
 最良白）冇呀, 我明啦, 小道姑梗係啦, 佢又生得青靚又白淨. 今日日間在梅花觀, 你經已同佢眉來眼去, 柳夢梅, 你呀, 我限你在半個時辰, 將呢個小道姑從樓內交出, 否則我就拉你上道錄司衙, 問你一個穢亂庵堂, 勾搭道姑之罪, 拉你...
 石姑）陳齋長到底柳秀才有乜野事犯嚫你, 令到你夜扣南樓連宵叫駡. 
 韶陽女）陳齋長, 我方才係小樓之外, 聽見你右一句小道姑, 左一句小道姑, 到底小尼姑有乜野, 同你過唔去呀, 你唔應該污辱了清白人家. 
 夢梅白）係咪呀, 係咪呀
 最良白）你咪加咀住. 
 最良）亞石姑, 唉吔, 妳睇吓妳個樣, 妳真係石姑囉, 妳睇吓妳成舊石咁, 唉今晚呢件事, 非同小可, 我適間明明聽見南樓之內, 細語遇遇, 鶯聲歷歷, 到底呢個小道姑呀係房內而出, 就係房外而入呀, 你話晒上咗年紀嘅人, 應該講番句老實話呀. 
 石姑）老冬烘, 自黃昏起, 小道姑都陪我在經堂敲誦, 一直到現在陪我到嚟, 未有離開我半步, 你都分明無風作浪, 過事喧嘩. 
 夢梅白）老師, 咁你明白啦, 你冤枉人. 
 最良白）咪嘈... 哈...奇啦, 芳苑無人, 莫不是樓中有鬼...唔係...唔係, 假如我有冤枉佢, 我就甘受雷劈天打, 嗱石姑, 除咗你呀...你兩只道姑之外, 太守衙內何處更有嬌娃呢, 舊時陣都仲話有...仲有個杜麗娘小姐呀, 可惜佢都死咗三年長. 
 夢梅白）哎吔. 
 最良白）三尺桐棺都怕已隨風物化, 你驚呀呢...驚啦, 芳苑都更無紅粉在, 莫非天女無端夜散花咩, 
 石姑白）秀才, 你唔駛驚慌嘅, 陳齋長, 冇謂多事啦, 咁夜搔擾人哋清雅唔好呀, 求其事幹過得去就了囉, 休息下罷啦. 
 韶陽女白）秀才, 睇下你呀, 慌到手騰腳震做乜野呢. 
 石姑白）小道姑, 明日就係杜小姐三年忌日, 應該在佢墳前化些紙帛, 你同我入去早為打點把啦, 亞秀才, 你休息下, 陳齋長, 唔好多事啦, 返去書齋啦. 
 最良白）豈有此你, 你快的交出嚟呀, 唔交出嚟, 我梗拉你上道錄司衙嘅, 你記住嚟. ..
 
 夢梅唱）哎吔, 說什麼丹青配, 祗不過係霎眼煙霞.